ឱកាសការងារ និងកម្មសិក្សាការងារ១៤៥០កន្លែង រង់ចាំសិស្ស និស្សិត និងអ្នកស្វែងរកការងារនៅថ្ងៃទី២៥ ខែកក្កដា
ចេញផ្សាយ ថ្ងៃទី ២៣ ខែ កក្កដា ឆ្នាំ ២០២៤
នៅថ្ងៃទី២៥ ខែកក្កដា ឆ្នាំ២០២៤ ក្រុមហ៊ុនធំៗចំនួន ១៧ នឹងផ្តល់ឱកាសការងារ ក៏ដូចជាកម្មសិក្សាការងារ ចំនួន ១៤៥០កន្លែង សម្រាប់យុវជន សិស្ស/និស្សិត និងអ្នកស្វែងរកការងារ ចាប់ពីម៉ោង ៨ព្រឹក ដល់ ៥ល្ងាច នៅក្នុងបរិវេណសាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច (RULE)។នេះបើយោងតាមទីភ្នាក់ងារជាតិមុខរបរ និងការងារ នៃក្រសួងការងារនិង បណ្ដុះបណ្ដាលវិជ្ជាជីវៈ។
ទីភ្នាក់ងារជាតិមុខរបរ និងការងារ បានបញ្ជាក់ថា វេទិកាការងារ និងឱកាសកម្មសិក្សាការងារនេះជាកិច្ចសហការជាមួយ សាកលវិទ្យាល័យភូមិន្ទនីតិសាស្ត្រ និងវិទ្យាសាស្ត្រសេដ្ឋកិច្ច និង សហភាពសហព័ន្ធយុវជនកម្ពុជា វិស័យការងារ និងបណ្តុះបណ្តាលវិជ្ជាជីវៈ ដើម្បីផ្តល់ភាពងាយស្រួលដល់យុវជន សិស្ស/និស្សិត ក្នុងការដាក់ពាក្យស្វែងរកការងារ និងសម្ភាសការងារជាមួយតំណាងក្រុមហ៊ុនធំៗនៅមួយកន្លែងភ្លាមៗតែម្តង។
របាយការណ៍របស់ទីភ្នាក់ងារជាតិមុខរបរ និងការងារ បានឱ្យដឹងថា នៅចុងខែកក្កដា នេះ កម្ពុជាមានឱកាសការងារសរុបចំនួន ៥៣ ៧៦១កន្លែង ក្នុងនោះវិស័យឧស្សាហកម្មមានចំនួន ៤៤១៤៦កន្លែង, សេវាកម្ម ៤៧២៩កន្លែង និងវិស័យកសិកម្ម ៤៨៨៦កន្លែង។
ចំណែកតំបន់ដែលមានតម្រូវការកម្លាំងពលកម្មច្រើនជាងគេវិញ រួមមាន ខេត្តកំពង់ស្ពឺ ត្រូវការកម្លាំងពលកម្មចំនួន ១១ ៦២០កន្លែង, រាជធានីភ្នំពេញ ចំនួន ១០ ៧៣៣កន្លែង, ខេត្តកំពង់ឆ្នាំង ១០ ៣០០កន្លែង, ខេត្តស្វាយរៀង ៩០៦១កន្លែង, ខេត្តតាកែវ ៣៩១០កន្លែង, ខេត្តរតនគិរី ៣១៨៦កន្លែង, ខេត្តក្រចេះ ១៥០០កន្លែង, ខេត្តកណ្តាល ១១១០កន្លែង, ខេត្តបន្ទាយមានជ័យ ៨១១កន្លែង, ខេត្តកំពង់ចាម ៣៤២កន្លែង និងខេត្តផ្សេងៗ ១១៨៨កន្លែង៕
