មេដឹកនាំបារាំងថា សហភាពអ៉ឺរ៉ុប មិនធ្វើសង្គ្រាមទល់នឹងរុស្ស៊ីទេ តែនឹងជួយអ៊ុយក្រែនស្វែងរកសន្តិភាព
AKP ភ្នំពេញ ថ្ងៃទី២៩ ខែឧសភា ឆ្នាំ២០២៤ —
ប្រធានាធិបតីបារាំង លោក អេមម៉ានុយអ៊ែល ម៉ាក្រុន (Emmanuel Macron) បាននិយាយនៅក្នុងសុន្ទរកថាមួយនៅទីក្រុងដ្រេសដេនថា បណ្តាប្រទេសនៅអឺរ៉ុបនមិនធ្វើសង្រ្គាមជាមួយប្រទេសរុស្ស៊ី និងប្រជាជនរបស់រុស្ស៊ីនោះទេ។
លោក ម៉ាក្រុន បាននិយាយនៅក្នុងការអត្ថាធិប្បាយដែលត្រូវបានចាក់ផ្សាយនៅលើគណនីបណ្តាញសង្គមអ៊ិច (X) របស់វិមានអេលីហ្សេថា «យើងដែលជាជនជាតិអឺរ៉ុបមិនធ្វើសង្រ្គាមជាមួយរុស្ស៊ី និងប្រជាជនរុស្ស៊ីទេ»។
ទោះជាយ៉ាងណាក៏ដោយ លោកបាននិយាយថា ប្រទេសនៃសហភាពអឺរ៉ុបគ្រោង នឹងបន្តផ្តល់ជំនួយដល់អ៊ុយក្រែន ឱ្យបានយូរតាមដែលខ្លួនត្រូវការ។ ប្រធានាធិបតីបារាំងក៏បាននិយាយផងដែរថា ប្រជាជនអឺរ៉ុបគាំទ្រចំពោះកិច្ចខិតខំប្រឹងប្រែងសម្រាប់ដំណោះស្រាយសន្តិភាពយូរអង្វែងនៅអ៊ុយក្រែន។
ប្រធានាធិបតីរូបនេះ បានបន្តថា «សន្តិភាពនឹងមិនមានន័យថាជាការកាន់កាប់អ៊ុយក្រែននោះទេ។ វានឹងក្លាយជាសន្តិភាពដែលប្រជាជនអ៊ុយក្រែនខ្លួនឯងជាអ្នកជ្រើសរើស»។
សូមរំលឹកផងដែរថា លោក ម៉ាក្រុន បានទៅដល់ប្រទេសអាល្លឺម៉ង់កាលពីថ្ងៃទី២៦ ខែឧសភា ក្នុងដំណើរទស្សនកិច្ចផ្លូវរដ្ឋជាលើកដំបូងរបស់ប្រធានាធិបតីបារាំងក្នុងរយៈពេល ២៤ឆ្នាំកន្លងមកសម្រាប់កិច្ចប្រជុំជាមួយប្រធានាធិបតីអាល្លឺម៉ង់ លោក ហ្រ្វេង វ៉ាលធ័រ ស្តេនម៉ែរ (Frank-Walter Steinmeier) និងអធិការបតីអាល្លឺម៉ង់ លោក អូឡាហ្វ ស្កូលហ្ស៍ (Olaf Scholz)៕
