កម្ពុជាទទួលបានចំណូល៩០០លានដុល្លារពីការនាំចេញអង្ករ រយៈពេល៤ខែ
ចេញផ្សាយ ថ្ងៃទី ០៧ ខែ ឧសភា ឆ្នាំ ២០២៥
MoINFO APP
សហព័ន្ធស្រូវអង្ករកម្ពុជា (CRF)បានឱ្យដឹងថា ក្នុងរយៈពេល៤ខែ នៃឆ្នាំ២០២៥ នេះ កម្ពុជាបាននាំចេញអង្ករ-ស្រូវសើមទៅកាន់ទីផ្សារអន្តរជាតិ ទទួលបានទឹក ប្រាក់ប្រមាណ ៩០០លានដុល្លារអាមេរិក ។ក្នុងនោះ អង្ករចំនួន ២៨២ ៣១៣ តោន ក្នុងតម្លៃ២០៩.២២លាន ដុល្លារ និងស្រូវសើមចំនួន ៣ ០៣១ ៤៣១ តោន មានតម្លៃប្រមាណ៧២៣.០៥លានដុល្លារ។
ការប្រកាសឱ្យដឹងកាលពីថ្ងៃទី៥ ខែឧសភា បានឱ្យដឹងថា សម្រាប់ការនាំចេញ អង្ករក្នុងបរិមាណខាងលើត្រូវបានធ្វើឡើងតាមរយៈក្រុមហ៊ុននាំចេញអង្ករ ចំនួន៤៨ ក្រុមហ៊ុន ទៅកាន់គោលដៅចំនួន ៥៩ ដែលក្នុងនោះទៅកាន់បណ្តាប្រទេសនៅក្នុងតំបន់អឺរ៉ុបចំនួន២៦ បានបរិមាណអង្ករចំនួន ១៣៤ ២១២ តោន គិតជាទឹកប្រាក់ចំនួន ១០៦.១៩ លានដុល្លារ ទៅកាន់ប្រទេសចិន និងហុងកុង ចំនួន ៧០.៤៣៥តោន គិតជាទឹកប្រាក់ចំនួន ៤១.៣៨ លានដុល្លារ ។
ចំពោះការនាំទៅប្រទេសក្នុងអាស៊ានចំនួន៥ប្រទេសមានបរិមាណចំនួន៤០ ២៩១ តោន គិតជាទឹកប្រាក់ចំនួន ២៨.៨៨ លានដុល្លារនិងទៅកាន់គោលដៅ ២៦ ប្រទេសផ្សេងទៀតមាន អាហ្វ្រិក មជ្ឈឹម បូព៌ា អាមេរិក កាណាដា អូស្ត្រាលី ញូហ្សេលេន ។ល។ចំនួន ៣៧ ៣៧៥ តោន គិតជាទឹកប្រាក់ចំនួន ៣២.៧៧ លានដុល្លារ។ សម្រាប់ប្រភេទអង្ករ បាននាំចេញអង្ករក្រអូបចំនួន៧៧.៩៤ ភាគរយ ប្រភេទអង្ករសគ្រាប់វែង១៧.១៥ភាគរយ អង្ករចំហុយ ២.៤៧ភាគរយ អង្ករសរីរាង្គចំនួន ១.៩៥ភាគរយ និងអង្ករផ្សេងៗចំនួន ០.៤៩ភាគរយ។
គួររំលឹកថា ក្នុងឆ្នាំ២០២៤ កម្ពុជាមានផលិតកម្មស្រូវសរុបជាង១៣ លានតោន លើសឆ្នាំ២០២៣ ប្រមាណកន្លះលានតោន និងលើសកាលពី៥ឆ្នាំមុនប្រមាណ ៣លានតោន ។ក្នុងនោះប្រមាណ៥០ភាគរយ ត្រូវបាននាំចេញ ទាំងជាស្រូវ និងជាអង្ករ ។ កម្ពុជាផលិតស្រូវលើសពីតម្រូវវការក្នុងស្រុកប្រមាណ ៥០ ភាគរយ ឬប្រមាណ ៦លានតោនក្នុងមួយឆ្នាំ។ ចំណែកឯរោងម៉ាស៊ីនកិនស្រូវខ្នាតមធ្យម និងធំ កាលពីឆ្នាំ២០២៤ មានចំនួន៨០រោងម៉ាស៊ីន ដែលមានស្តង់ដាអាចឆ្លើយតបទៅនឹងបទដ្ឋានអន្តរជាតិ លើផ្នែកសុវត្ថិភាពចំណីអាហារ និងមានលទ្ធភាពសម្ងួតស្រូវចំនួន៥០ពាន់តោន ស្រូវសើមក្នុងមួយថ្ងៃ៕
