ក្រុមហ៊ុនធំមួយរបស់ចិន ចង់ទិញគ្រាប់ស្វាយចន្ទីក្រៀម ២០ ម៉ឺនតោនពីកម្ពុជានៅឆ្នាំក្រោយ
APP MoINFO
ក្រុមហ៊ុនធំមួយរបស់ចិនដែលមានមូលដ្ឋាននៅខេត្តគ័រងស៊ី បានបង្ហាញពីបំណងទិញគ្រាប់ស្វាយចន្ទីក្រៀមពីកម្ពុជាចំនួន ២០ ម៉ឺនតោនសម្រាប់ឆ្នាំ២០២៥ខាងមុខ។ នេះបើយោងតាមប្រភព AMS Economy។
លោក អួន ស៊ីឡុត ប្រធានសមាគមស្វាយចន្ទីកម្ពុជាបានប្រាប់ AMS Economy កាលពរសៀលថ្ងៃទី២៣ ខែឧសភា ឆ្នាំ២០២៤នេះថា ក្រុមហ៊ុនចិនចង់ទិញស្វាយចន្ទីស្ងួតពីកម្ពុជាសម្រាប់ផ្គត់ផ្គង់នៅក្នុងខេត្តគ័រងស៊ី ខណៈក្រុមប្រឹក្សាភិបាលរបស់ក្រុមហ៊ុន និងក្រុមការងារសមាគមបានត្រៀមចរចាមួយជំហានទៀតដើម្បីឈានទៅសម្រេចនីតិវិធីលើការដឹកជញ្ជូន និងចុះកុងត្រា។
លោកប្រធានសមាគមបានបន្ថែមថា ចំពោះនឹងធ្វើឡើងទៅតាមទីផ្សារ ខណៈបច្ចុប្បន្នចន្ទីមានតម្លៃប្រមាណជាង ១៦០០ ដុល្លារក្នុងមួយតោន ។លោកថា ភាគីក្រុមហ៊ុនបានដឹងពីគុណភាពចន្ទីកម្ពុជារួចហើយ។ ដោយឡែក កាលពីខែមេសាកន្លងទៅនេះ គ្រាប់ស្វាយចន្ទីសើមមានតម្លៃ ៥ ០០០រៀល ក្នុងមួយគីឡូក្រាម ដែលជាតម្លៃខ្ពស់ជាងគេក្នុងរយៈពេល១៥ឆ្នាំចុងក្រោយនេះ។
ប្រធានសមាគមស្វាយចន្ទីកម្ពុជាបានបញ្ជាក់ថា រយៈពេលបីខែដើមឆ្នាំនេះ កម្ពុជាផលិតគ្រាប់ស្វាយចន្ទីឆៅបានជាង ៤៧៤ ០០០តោន ។ក្នុងនោះបាននាំចេញទៅប្រទេសវៀតណាមចំនួន ៤២៤ ០០០ តោន គិតជាទឹកប្រាក់ ៥៤៣ លានដុល្លារ ។
