កុមារ ដែលបានទប់ស្កាត់ពីការប្រើប្រាស់ ពលកម្មកុមារនៅតាមសហគ្រាស ផលិតឥដ្ឋ ក្បឿងតាមរយៈកិច្ចអន្តរាគមន៍ស្នួល ឆ្នាំ២០២៥ ទទូលបានសម្ភារសិក្សា និងមធ្យោបាយធ្វើដំណើរ ពីមន្ទីរការងារ និងបណ្តុះបណ្តាលវិជ្ជាជីវៈ
ព្រៃវែង៖ នៅថ្ងៃទី ២៧ ខែវិច្ឆិកា ឆ្នាំ២០២៥ មន្ទីរការងារ និងបណ្តុះបណ្តាលវិជ្ជាជីវៈ បានសហការជាមួយនាយកដ្ឋានការងារកុមារ នៃក្រសួងការងារ និងបណ្តុះបណ្តាល វិជ្ជាជីវៈ បានរៀបចំចែកសម្ភារសិក្សា និងមធ្យោបាយធ្វើដំណើរជូនកុមារ ដែលបានទប់ស្កាត់ពីការប្រើប្រាស់ ពលកម្មកុមារនៅតាមសហគ្រាស ផលិតឥដ្ឋ ក្បឿងតាមរយៈកិច្ចអន្តរាគមន៍ស្នួល ឆ្នាំ២០២៥ ក្រោមអធិបតីភាព ឯកឧត្តម វ៉េង ហៀង អនុរដ្ឋលេខាធិការ តំណាងដ៏ខ្ពង់ខ្ពស់ ឯកឧត្តម ហេង សួរ រដ្ឋមន្ត្រីក្រសួង ការងារ និងបណ្តុះបណ្តាលវិជ្ជាជីវៈ និងលោក លាត ភិរុណ អភិបាលរងខេត្តព្រៃវែង ព្រមទាំងមានការអញ្ជើញចូលរួមពីថ្នាក់ដឹកនាំ នាយកដ្ឋានការងារកុមារ នាយកដ្ឋានអធិការកិច្ចការងារ មន្ទីរ អង្គភាពពាក់ព័ន្ធ អង្គការដៃគូ គណៈអភិបាល អធិការនគរបាល កងរាជអាវុធ ហត្ថស្រុក ក្រុមប្រឹក្សាឃុំ លោកគ្រូ អ្នកគ្រូ ម្ចាស់សិប្បកម្ម កុមារ និងអាណាព្យាបាលកុមារ ស្រុកព្រះស្តេច ស្រុកពាមរក៍ ស្រុកស្វាយអន្ទរ ស្រុកកញ្ជៀច និងស្រុកស៊ីធរកណ្តាល សរុបប្រមាណៈ សរុប ១៩៥ នាក់ ស្រី៩១នាក់ ដែលប្រព្រឹត្តទៅ នៅបរិវេណសាលាស្រុកស្វាយអន្ទរ ខេត្តព្រៃវែង។
ឆ្លៀតក្នុងឱកាសនេះផងដែរ លោក ណុប សាវ៉ាត ប្រធានមន្ទីរការងារ និងបណ្តុះបណ្តាលវិជ្ជាជីវៈ លើកឡើងថា មន្ទីរការងារ និងបណ្តុះបណ្តាលវិជ្ជាជីវៈខេត្តព្រៃវែង បានអនុវត្តកិច្ចអន្តរាគមន៍ស្នូលចាប់តាំងពី ឆ្នាំ២០២៤ រហូរមកដល់បច្ចុប្បន្ន ដែលមានរយៈពេល ២ឆ្នាំ (ឆ្នាំ២០២៤ និងឆ្នាំ២០២៥) ដែលបានជួយកុមារ ងាយរងគ្រោះសរុប ១០០នាក់ ស្រី ៤៥នាក់ ក្នុងនោះកុមារទប់ស្កាត់ចំនួន ១០០នាក់ ស្រី ៤៥នាក់ និងកុមារ បន្តការគាំពារចំនួន ៩០នាក់ ស្រី ៤០នាក់ ។ តាមរយៈថវិកាកម្មវិធីឆ្នាំ២០២៥ មន្ទីរការងារ និងបណ្តុះបណ្តាលវិជ្ជាជីវៈខេត្ត បានទទួលថវិកា សម្រាប់អនុវត្តកិច្ចអន្តរាគមន៍ស្នូលចំនួន ៩០នាក់ (បន្តគាំពារ ៤០នាក់ និងទប់ស្កាត់ ៥០នាក់) ក្នុងស្រុកគោលដៅ ចំនួន ៥ មានស្រុកព្រះស្តេច ស្រុកពាមរក៍ ស្រុកស្វាយអន្ទរ ស្រុកកញ្ជ្រៀច និងស្រុកស៊ីធរកណ្តាល ខេត្តព្រៃវែង ។ តាមរយៈការចុះសម្ភាសន៍ និងវាយតម្លៃកុមារងាយរងគ្រោះសិប្បកម្មផលិតឥដ្ឋ ក្បឿង ចំនួន ៩០នាក់ ស្រី ៤៥នាក់ទទួលបានគម្រោងកិច្ចអន្តរាគមន៍ស្នូល ដែលកុមារទាំងនោះទទួលបានការបំប៉នការអប់រំ សម្ភារសិក្សា និង មធ្យោបាយធ្វើដំណើរ ។
សម្រាប់ឆ្នាំ២០២៥ នេះ មន្ទីរការងារ និងបណ្តុះបណ្តាលវិជ្ជាជីវៈខេត្តព្រៃវែង និងអាជ្ញាធរមូលដ្ឋាន បានចុះស្រង់ស្ថិតិ និងសម្ភាសន៍កុមារងាយរងគ្រោះចំនួន ៦០នាក់ (ស្រី ២៦នាក់) ដែលរស់នៅជុំវិញបរិវេណ សិប្បកម្មផលិតឥដ្ឋចំនួន ១៨ទីតាំង នៅស្រុកព្រះស្តេច ស្រុកពាមរក៍ ស្រុកស្វាយអន្ទរ ស្រុកកញ្ចៀច និងស្រុក ស៊ីធរកណ្តាល ។ ដោយក្នុងនោះក្រុមការងារបានកំណត់អត្តសញ្ញាណកុមារគោលដៅ ដែលទទួលកិច្ចអន្តរាគមន៍ ស្នូល ចំនួន ៥០នាក់ (ស្រី ២០នាក់)
លោក លាត ភិរុណ អភិបាលរងខេត្តព្រៃវែង មានប្រសាសន៍ថា កិច្ចអន្តរាគមន៍ស្នួល គឺជាផ្នែកមួយនៃកិច្ចអន្តរាគមន៍សង្គម ក្នុងការជួយទប់ស្កាត់កុមារពីការធ្លាក់ ចូលក្នុងទម្រង់ធ្ងន់ធ្ងរ ឬគ្រោះថ្នាក់ការងារ និងកិច្ចការពារ ឬសង្គ្រោះកុមារក្នុងស្ថានភាពដែលកុមារ បានប្រឈម នឹងគ្រោះថ្នាក់ការងារ ឬជាពលកម្មកុមារ។ កិច្ចអន្តរាគមន៍ស្នូល ពឹងផ្អែកសំខាន់ទៅលើយន្តការបង្អែក ឬកិច្ចគាំពា រសង្គមសម្រាប់កុមារ ដូចជាការផ្តល់ឱកាសឱ្យកុមារទទួលបានការអប់រំ ការបណ្តុះបណ្តាលជំនាញ និងកម្មវិធី បង្កើតមុខរបរសម្រាប់កុមារ និងក្រុមគ្រួសាររបស់ពួកគេ ។
ឯកឧត្តម វ៉េង ហៀង អនុរដ្ឋលេខាធិការ ក្រសួង ការងារ និងបណ្តុះបណ្តាលវិជ្ជាជីវៈ មានប្រសាសន៍លើកឡើងដែរថា ដោយបានការយកចិត្តទុកដាកខ្ពស់ ពីរាជរដ្ឋាភិបាល ដែលមានសម្តេចអគ្គមហាសេនាបតីតេជោ ហ៊ុន សែន អតីនាយករដ្ឋមន្ត្រី នៃ ព្រះរាជាណាចក្រកម្ពុជា និងថ្នាក់ដឹកនាំរាជរដ្ឋាភិបាលកម្ពុជា នាពេលបច្ចុប្បន្ន ដែលមាន សម្តេចមហាបវរធិបតី ហ៊ុន ម៉ាណែត ជានាយករដ្ឋមន្ត្រី បានបន្តផ្តល់ការគាំទ្រ និងអនុញ្ញាតឱ្យក្រសួងការងារ និងបណ្តុះបណ្តាល វិជ្ជាជីវៈ ទទួលបានកញ្ចប់ថវិកាសម្រាប់អនុវត្តគម្រោងកិច្ចអន្តរាគមន៍ស្នូលដើម្បី ទប់ស្កាត់ ការពារ និងបន្តការគាំពារកុមារ នៅតាមសិប្បកម្មផលិតឥដ្ឋ ក្បឿង ដើម្បីឈានទៅលុបបំបាត់ទម្រង់ធ្ងន់ធ្ងរបំផុត នៃពលកម្មកុមារ នៅប្រទេសកម្ពុជា នេះនិយាយជារួម និងនិយាយដោយឡែកគឺនៅក្នុងដែនសមត្ថកិច្ចខេត្តព្រៃវែងផងដែរ ។
ឯកឧត្តម អនុរដ្ឋលេខាធិការ មានប្រសាសន៍បន្តថា រាជរដ្ឋាភិបាលកម្ពុជា ដែលមានក្រសួងការងារ និងបណ្តុះបណ្តាលវិជ្ជាជីវៈ ជាសេនាធិការ បាន យកចិត្តទុកដាក់លើការកាត់បន្ថយពលកម្មកុមារ តាមរយៈការដាក់ចេញនូវសកម្មភាពអាទិភាពចំនួន៥ រួមមាន (សកម្មភាពស្នូលរបស់នាយកដ្ឋាន) (១) រៀបចំ និងធ្វើបច្ចុប្បន្នភាពក្របខ័ណ្ឌ គោលនយោបាយ ផែនការ សកម្មភាពជាតិ និងលិខិតបទដ្ឋានគតិយុត្តពាក់ព័ន្ធនឹងការលុបបំបាត់ពលកម្មកុមារ និងទម្រង់ធ្ងន់ធ្ងរបំផុតនៃ ពលកម្មកុមារ (២) ការលើកកម្ពស់ការអប់រំ និងការផ្សព្វផ្សាយស្តីពីលុបបំបាត់ពលកម្មកុមារ និងទម្រង់ធ្ងន់ធ្ងរ
បំផុតនៃពលកម្មកុមារ (៣) ការពង្រឹងការអនុវត្តច្បាប់ តាមរយៈវិធានការអធិការកិច្ចការងារ យន្តការទទួលពាក្យ បណ្ដឹង និងអន្តរាគមន៍ (៤) ការអនុវត្តកិច្ចអន្តរាគមន៍ស្នូល ដើម្បីការលុបបំបាត់ពលកម្មកុមារ និងទម្រង់ធ្ងន់ធ្ងរ បំផុតនៃពលកម្មកុមារ (៥) កិច្ចសហការជាមួយក្រសួង-ស្ថាប័ន និងពង្រីកភាពជាដៃគូជាមួយដៃគូអភិវឌ្ឍ និង អង្គការនានាដើម្បីការលុបបំបាត់ពលកម្មកុមារ និងទម្រង់ធ្ងន់ធ្ងរបំផុតនៃពលកម្មកុមារ៕
