កិច្ចប្រជុំបូកសរុបលទ្ធផលការងារPWGប្រចាំ ឆ្នាំ២០២៥ និងលើកទិសដៅការងារបន្តឆ្នាំ២០២៦ របស់មន្ទីរអភិវឌ្ឍន៍ជនបទខេត្តព្រៃវែង
(ព្រៃវែង) នៅព្រឹកថ្ងៃទី១៩ ខែវិច្ឆិកា ឆ្នាំ២០២៥ មន្ទីរអភិវឌ្ឍន៍ជនបទខេត្តព្រៃវែង បានរៀបចំកិច្ចប្រជុំបូកសរុបលទ្ធផលការងារPWGប្រចាំ ឆ្នាំ២០២៥ និងលើកទិសដៅការងារបន្តឆ្នាំ២០២៦ របស់មន្ទីរអភិវឌ្ឍន៍ជនបទខេត្តព្រៃវែង ក្រោមអធិបតីភាព ឯកឧត្តម សាយ សុជាតិ អភិបាលរងខេត្ត និងជាប្រធានPWG តំណាងដ៏ខ្ពង់ខ្ពស់ ឯកឧត្តម សួន សុម៉ាលីន អភិបាល នៃគណៈអភិបាលខេត្តព្រៃវែង ដោយមានការអញ្ជើញចូលរួមពីសំណាក់ លោក លោកស្រីប្រធាន អនុប្រធានមន្ទីរ អង្គភាពជុំវិញខេត្ត លោក លោកស្រី អភិបាលរងក្រុង ស្រុកទាំង ១៣ លោក លោកស្រីថ្នាក់ដឹកនាំ និងមន្ត្រីរាជការនៃមន្ទីរអភិវឌ្ឍន៍ជនបទ អង្គការដៃគូ និងអង្គភាពពាក់ព័ន្ធ សរុបអ្នកចូលរួម ចំនួន ៨៧នាក់ នៅបន្ទប់ប្រជុំ C របស់មន្ទីរអភិវឌ្ឍន៍ជនបទខេត្តព្រៃវែង។
ជាកិច្ចចាប់ផ្តើម លោក ឡុក វុឌ្ឍី ប្រធានមន្ទីរអភិវឌ្ឍន៍ជនបទខេត្តព្រៃវែង បានគោរពរាយការណ៍ជូននូវរបាយការណ៍ស្តីពីលទ្ធផលការងារPWGប្រចាំ ឆ្នាំ២០២៥ និងលើកទិសដៅការងារបន្តឆ្នាំ២០២៦ របស់មន្ទីរអភិវឌ្ឍន៍ជនបទខេត្ត ។ លោកប្រធានមន្ទីរបានមានប្រសាសន៍បន្ថែមថាៈ ការងារអភិវឌ្ឍន៍ជនបទត្រូវតែមានការ ចូលរួមគ្រប់ភាគីពាក់ព័ន្ធ ជាពិសេសបងប្អូនប្រជាពលរដ្ឋនៅមូលដ្ឋានផ្ទាល់ ទើបការអភិវឌ្ឍន៍សម្រេចបានជោគជ័យ និងមាននិរន្តរភាព និងបន្តសម្រេចឱ្យបាននូវការបន្ទោបង់ពាសវាលពាសកាលកម្រិតខ្ពស់(ODF Plus) ក្នុងឆ្នាំ២០២៦ នាពេលខាងមុខបន្តទៀត។
សមិទ្ធផលដែលមន្ទីរអភិវឌ្ឍន៍ជនបទខេត្ត សម្រេចបានក្នុងឆ្នាំ២០២៥ ក្រោមការដឹកនាំ ចង្អុលបង្ហាញប្រកបដោយចក្ខុវិស័យវែងឆ្ងាយរបស់ឯកឧត្តម ឆាយ ប្ញទ្ធិសែន រដ្ឋមន្រ្តីក្រសួងអភិវឌ្ឍន៍ជនបទ និងបានកោតសរសើរ និងវាយតម្លៃខ្ពស់ចំពោះ ថ្នាក់ដឹកនាំ និងក្រុមការងារ PWG PWGs DWG CWG អង្គការដៃគូ ចំពោះការខិតខំអនុវត្តគម្រោងឱ្យសម្រេចបាននូវសមិទ្ធផលយ៉ាងច្រើនសន្ធឹកសន្ធាប់ ដែលជាការចូលរួមសម្រេចនូវយុទ្ធសាស្ដ្របញ្ចកោណដំណាក់កាលទី១ របស់រាជរដ្ឋាភិបាល ដោយផ្អែកលើបាវចនាចំនួន ៥ គឺ មនុស្ស ផ្លូវ ទឹក ភ្លើង និងបច្ចេកវិទ្យាឌីជីថល ដែលសំដៅសម្រេចឱ្យបានចក្ខុវិស័យកម្ពុជាឆ្នាំ២០៥០ ជាប្រទេសមានចំណូលខ្ពស់។
ក្រសួងអភិវឌ្ឍន៍ជនបទ បាននិងកំពុងយកចិត្តទុកដាក់លើការសម្រេចឱ្យបានតាមចក្ខុវិស័យរបស់ខ្លួន គឺ “ការលើកកម្ពស់គុណភាព និងគុណតម្លៃនៃជីវិតរស់នៅរបស់ប្រជាជនជនបទប្រកបដោយបរិយាប័ន្ន ទាំងផ្នែកសេដ្ឋកិច្ច សង្គម និងវប្បធម៌” តាមរយៈកម្មវិធីអាទិភាពចំនួន៥ រួមមាន ទី១.ការអភិវឌ្ឍហេដ្ឋារចនាសម្ព័ន្ធរូបវន្ត និងគមនាគមន៍ជនបទ ទី២.ការកែលម្អលក្ខខណ្ឌនៃការរស់នៅរបស់សហគមន៍ជនបទ ទី៣. ការអភិវឌ្ឍភូមិគំរូ និងចលនាភូមិថ្មី ទី៤.ការធ្វើពិពិធកម្មសកម្ម ភាពសេដ្ឋកិច្ចជនបទ និងទី៥.ការពង្រឹងស្ថាប័ន អភិវឌ្ឍសមត្ថភាព និងធនធានមនុស្ស ក្នុងគោលបំណងធានាការបង្កើនប្រាក់ចំណូលគ្រួសារនៅជនបទប្រកបដោយចីរភាព និងធានាសុខុមាលភាពនៃជីវិតរស់នៅប្រជាជននៅជនបទឱ្យកាន់តែល្អប្រសើរឡើង។
ឯកឧត្តម សាយ សុជាតិ អភិបាលរងខេត្ត ក្នុងនាមថ្នាក់ដឹកនាំខេត្ត និងក្នុងនាមខ្លួនខ្ញុំផ្ទាល់ ខ្ញុំសូមសំដែងនូវការគាំទ្រកោតសរសើរដ៏ស្មោះចំពោះថ្នាក់ដឹកនាំក្រសួងអភិវឌ្ឍន៍ជនបទ និងមន្ត្រីរាជការទាំងអស់របស់មន្ទីរអភិវឌ្ឍន៍ជនបទខេត្ត ដែលបានខិតខំប្រឹងប្រែងយកអស់កំលាំងកាយចិត្ត បានរួមសហការជាមួយអាជ្ញាធរមូលដ្ឋាន ដៃគូអភិវឌ្ឍន៍ អង្គការមិនមែនរដ្ឋាភិបាល និងវិស័យឯកជនទាំងអស់ក្នុងខេត្តព្រៃវែង ដែលបានចូលរួមអនុវត្តយ៉ាងសកម្ម និងផ្តល់នូវការគាំទ្រយ៉ាងពេញទំហឹងរបស់ក្រសួងអភិវឌ្ឍន៍ជនបទ ដល់មន្ទីរអភិវឌ្ឍន៍ជនបទ ខេត្ត ក្នុងការបំពេញបេសកម្មដ៍លំបាកក្នុងរយៈពេលមួយឆ្នាំកន្លងមកនេះ ដើម្បីដឹកនាំអនុវត្តការងារតាមជំនាញរៀងៗខ្លួន ប្រកបដោយការទទួលខុសត្រូវខ្ពស់ ហើយសម្រេចបាននូវសមិទ្ធិផលធំៗជាច្រើនគួរឱ្យកត់សំគាល់ ក្នុងការចូលរួមចំណែកកាត់បន្ថយភាពក្រីក្រជូនប្រជាពលរដ្ឋនៅជនបទ និងការអភិវឌ្ឍន៍ប្រទេសជាតិរបស់យើង។ ឯកឧត្តម បានបន្តទៀតថាៈ សូមឱ្យមន្ត្រីមន្ទីរ សហការជាមួយអង្គភាពពាក់ បន្តចូលរួមការងារអភិវឌ្ឍន៍ជនបទនៅមូលដ្ឋានឱ្យបានកាន់តែប្រសើរឡើងថែមទៀត៕
