ប្រជាពលរដ្ឋដែលជាសហគមន៍នេសាទ បានប្រមូលផលត្រីលក់ដល់ប្រជាពលរដ្ឋ សម្រាប់យកទៅប្រើប្រាស់តាមកាចាំបាច់
ព្រៃវែង៖ តាំងពីព្រឹកព្រលឹមស្រាងៗ ប្រជាពលរដ្ឋដែលបានប្រមូលផលត្រីតាមបណ្ដាលព្រែកទន្លេនានាបានមកជុំគ្នានៅមុខទន្លេខេត្តព្រៃវែងដើម្បីយកត្រីទៅលក់បន្តដល់ប្រជាពលរដ្ឋដែលគាត់មានតម្រូវការក្នុងការប្រើប្រាស់ត្រីទាំងអស់នោះទៅតាមតម្រូវការចាំបាច់របស់គាត់។
ប្រជាពលរដ្ឋដែលគាត់ជាអ្នកប្រមូលផលត្រីនៅតាមព្រែក និងក៏ដូចជាទន្លេមួយចំនួននៅក្នុងទឹកដីនៃខេត្តព្រៃវែងគាត់ក៏បានលើកឡើងថាត្រីឆ្នាំនេះហាក់បីដូចជាមិនសូវសម្បូរដូចឆ្នាំកន្លងទៅនោះទេ។ តែទោះជាយ៉ាងនេះក្តីប្រជាពលរដ្ឋក៏នៅតែមកទិញជាហូរហែតម្រូវការមិនដាច់មានត្រីប៉ុន្មានគាត់យកប៉ុណ្ណឹង។
សូមបញ្ជាក់ផងដែរថា៖ ប្រជាពលរដ្ឋដែលគាត់ប្រមូលផលត្រីទាំងអស់នេះភាគច្រើនគឺនៅក្នុងឃុំព្រែកអន្ទះ ឃុំព្រែកជ្រៃ ឃុំពាមស្ដី និងឃុំមួយចំនួនទៀតនៅក្នុងស្រុកពោធិ៍រៀង និងឃុំស្រុកមួយចំនួនទៀត នៃខេត្តព្រៃវែង ដែលគាត់ប្រមូលផលត្រីនៅតាមទន្លេតូច ព្រែកមួយចំនួនដើម្បីយកមកលក់ដូរដល់ប្រជាពលរដ្ឋក្នុងការប្រើប្រាស់ទៅតាមតម្រូវការចាំបាច់របស់គាត់នៅឯទីផ្សារនៃក្រុងព្រៃវែងជារៀងរាល់ថ្ងៃនោះផងដែរ។
បើយោងតាមតាមការបញ្ជាក់របស់ លោក អូន ស៊ីណាត នាយខណ្ឌរដ្ឋបាលជលផល នៃមន្ទីរកសិកម្ម រុក្ខាប្រមាញ់ និងនេសាទខេត្តព្រៃវែង បានឲ្យដឹងថា ផលនេសាទគ្រួសាររបស់ប្រជាពលរដ្ឋនៅក្នុងខេត្តព្រៃវែងក្នុងខែវិច្ឆិកាឆ្នាំ ២០២៥ នេះការប្រមូលផលត្រីបានចំនួន ៥,១១៧ តោនផងដែរ៕
