រដ្ឋបាលខេត្តព្រៃវែង ប្រារព្ធពិធីបុណ្យខួបអនុស្សាវរីយ៍លើកទី៧២ នៃទិវាបុណ្យឯករាជ្យជាតិ ៩ វិច្ឆិកា និងទិវាកំណើតនៃកងយោធពលខេមរភូមិន្ទ
ព្រៃវែង ៖ នៅព្រឹកថ្ងៃទី០៩ ខែវិច្ឆិកា ឆ្នាំ២០២៥ រដ្ឋបាលខេត្តព្រៃវែង បានរៀបចំប្រារព្ធពិធីបុណ្យខួបអនុស្សាវរីយ៍លើកទី៧២ នៃទិវាបុណ្យឯករាជ្យជាតិ ៩ វិច្ឆិកា (៩ វិច្ឆិកា ១៩៥៣ – ៩ វិច្ឆិកា ២០២៥) និងទិវាកំណើតនៃកងយោធពលខេមរភូមិន្ទ យ៉ាងមហោឡារិក ដើម្បីរំលឹកដល់ព្រះរាជបូជនីយកិច្ចដ៏ឧត្តុង្គឧត្តមរបស់ព្រះវររាជបិតាជាតិខ្មែរ ព្រះបរមរតនកោដ្ឋ ព្រះករុណា ព្រះបាទសម្តេច នរោត្តម សីហនុ ក្នុងការទាមទារឯករាជ្យទាំងស្រុងពីអាណានិគមបារាំង និងរំលឹកគុណូបការៈរបស់កងយោធពលខេមរភូមិន្ទ។
ពិធីនេះត្រូវបានរៀបចំឡើងនៅសួនច្បារសម្តេចអគ្គមហាធម្មពោធិសាល ជា ស៊ីម ក្រុងព្រៃវែង ក្រោមអធិបតីភាពឯកឧត្ដម ស្បោង សារ៉ាត ប្រធានក្រុមប្រឹក្សាខេត្ត និងឯកឧត្តម សួន សុម៉ាលីន អភិបាលខេត្ត ព្រមទាំងមានការចូលរួមពី ឯកឧត្តម លោកជំទាវ សមាជិកក្រុមប្រឹក្សាខេត្ត អភិបាលរងខេត្ត ថ្នាក់ដឹកនាំ មន្ត្រីរាជការ កងកម្លាំងប្រដាប់អាវុធទាំងបី អាជ្ញាធរក្រុង/ស្រុក មន្ទីរ-អង្គភាពជុំវិញខេត្ត លោកគ្រូ អ្នកគ្រូ សិស្សានុសិស្ស និងប្រជាពលរដ្ឋយ៉ាងច្រើនកុះករ។
ក្នុងសុន្ទរកថារនោះ ឯកឧត្ដម ស្បោង សារ៉ាត ប្រធានក្រុមប្រឹក្សាខេត្ត បានគូសបញ្ជាក់ថា ថ្ងៃទី ៩ វិច្ឆិកា គឺជាទិវាប្រវត្តិសាស្ត្រដ៏ថ្លៃថ្លា ដែលកម្ពុជាបានទទួលឯករាជ្យពេញលេញបន្ទាប់ពីស្ថិតនៅក្រោមអាណានិគមបារាំងអស់រយៈពេលជិតមួយសតវត្សរ៍ (១១ សីហា ១៨៦៣ – ៩ វិច្ឆិកា ១៩៥៣)។ ព្រះរាជបូជនីយកិច្ចដឹកនាំដោយព្រះបរមរតនកោដ្ឋ គឺជាជោគជ័យដ៏ធំធេងដែលនាំមកនូវសិទ្ធិសេរីភាព បូរណភាពទឹកដី និងឯកភាពជាតិ។ ជាមួយគ្នានោះ ថ្នាក់ដឹកនាំក៏បានរំលឹក និងកោតសរសើរដល់ការលះបង់របស់កងយោធពលខេមរភូមិន្ទគ្រប់ជំនាន់ ដែលបានរួមចំណែកយ៉ាងសកម្មក្នុងការការពារមាតុភូមិ ថែរក្សាសន្តិសុខ សណ្ដាប់ធ្នាប់សាធារណៈ និងចូលរួមកសាងអភិវឌ្ឍន៍ប្រទេសជាតិ។
ឯកឧត្តម ប្រធានក្រុមប្រឹក្សាខេត្ត បន្តថា ប្រជារាស្ត្រកម្ពុជាទូទាំងប្រទេស បានថ្វាយព្រះ កិត្តិនាមព្រះអង្គជា «ព្រះមហាវីរបុរសជាតិ ព្រះបិតាឯករាជ្យជាតិ»។ ដើម្បីជាការចងចាំនូវព្រះរាជស្នាព្រះ ហស្ថដ៏ឧត្តុងឧត្តម នៃការទាមទារឯករាជ្យពីអាណានិគមបារាំងនេះ វិមានឯករាជ្យត្រូវបានកសាង និង សម្ពោធដាក់ឲ្យប្រើប្រាស់នៅឆ្នាំ១៩៥៨ ក្នុងរាជ្យព្រះបាទ នរោត្តម សុរាម្រិត (១៩៥៥-១៩៦០) ជាព្រះ រាជបិតារបស់សម្តេចព្រះ នរោត្តម សីហនុ។ វិមានឯករាជ្យនេះ ក៏ជានិមិត្តរូបបញ្ជាក់ថា ប្រទេសកម្ពុជា បាន ទទួលឯករាជ្យពីប្រទេសបារាំង នៅថ្ងៃទី៩ ខែវិច្ឆិកា ឆ្នាំ១៩៥៣ផងដែរ។
ឯកឧត្ដម បន្ថែមថា ប្រទេសកម្ពុជាតែងតែប្រារព្ធទិវាបុណ្យឯករាជ្យជាតិនេះ ដែលមានពិធីប្រទានភ្លើងទៀនជ័យ រំឭក គុណអ្នកស្នេហាជាតិ ដែលបានពលីជីវិត ដើម្បីឯករាជ្យពីពួកអាណានិគមបារាំង ហើយពិធីបុណ្យត្រូវបាន ធ្វើឡើងជារៀងរាល់ឆ្នាំ នៅថ្ងៃទី៩ ខែវិច្ឆិកា និងបញ្ចប់នៅថ្ងៃទី១១ វិច្ឆិកា ជាកំណត់។ ថ្ងៃ៩ វិច្ឆិកានេះ រាជរដ្ឋាភិបាលកម្ពុជា បានអនុញ្ញាតឲ្យសិស្សានុសិស្ស និស្សិត កម្មករ និយោជិត និងមន្ត្រីរាជការ បានឈប់ សម្រាកផងដែរ ដើម្បីចូលរួមអបអរសាទរ៕
