ក្រសួងទេសចរណ៍កម្ពុជាផ្សព្វផ្សាយសក្តានុពលទេសចរណ៍ និង កាលានុវត្តភាពវិនិយោគដល់តំណាងប្រទេសចំនួន២នៅអ៊ឺរ៉ុបខាងកើត
ចេញផ្សាយ ថ្ងៃទី ២៤ ខែ មេសា ឆ្នាំ ២០២៥
កោះ Galatasaray៖ នាល្ងាចថ្ងៃទី23 ខែមេសា ឆ្នាំ2025 ឯកឧត្តម ហួត ហាក់ រដ្ឋមន្ត្រីក្រសួងទេសចរណ៍ បានជួបពិភាក្សាការងារ និងពិសាអាហារពេលល្ងាចជាមួយលោក Volkan Öztürk អគ្គកុងស៊ុលកិត្តិយសកម្ពុជានៅទីក្រុងអ៊ីស្តង់ប៊ុល លោកស្រីអគ្គកុងស៊ុលកិត្តិយសអាល់បានីប្រចាំទីក្រុងអ៊ីស្តាន់ប៊ុល និងលោក Mahir ALP ប្រធានក្រុមប្រឹក្សាធុរកិច្ចតួកគី និងកម្ពុជា (Türkiye-Cambodia Business Council) លើកិច្ចសហការផ្សព្វផ្សាយពីសក្តានុពលទេសចរណ៍ និងកាលានុវត្តភាពវិនិយោគរបស់កម្ពុជាដល់ប្រជាពលរដ្ឋ និងធុរជននៅសាធារណរដ្ឋតួកគី និងសាធារណរដ្ឋអាល់បានីឱ្យកាន់តែទូលំទូលាយ តាមរយៈបណ្តាញអគ្គកុងស៊ុល និងធុរកិច្ច ជាពិសេសតាមរយៈការគាំទ្ររបស់ក្លឹបបាល់ទាត់ដ៏ល្បី Galatasaray Spor Kulübü។
ក្នុងជំនួបនេះ ឯកឧត្តមរដ្ឋមន្រ្តី បានគូសបញ្ជាក់ពីចំណុចដូចគ្នារវាងប្រទេសទាំងបីដែលជាប្រទេសមានសម្បត្តិវប្បធម៌ បេតិកភណ្ឌ និងប្រពៃណីទំនៀមទំលាប់ សក្តានុពលទេសចរណ៍ដ៏សំបូរបែប រួមទាំងការស្នាក់នៅផាសុកភាព និងចំរុះ ម្ហូបអាហារប្រពៃណីដ៏ឆ្ងាញ់ពិសារ ការទទួលបដិសណ្ឋារកិច្ចដ៏រាក់ទាក់ និងកក់ក្តៅដល់អ្នកទេសចរអន្តរជាតិ ហើយជាប្រទេសដែលមានលក្ខណៈពិសេសខាងភូមិសាស្រ្ត ដោយកម្ពុជាឋិតចំកណ្តាល និងជាតំបន់ឆ្លងកាត់នៃតំបន់អាស៊ាន រីឯប្រទេសតួកគីជាច្រកទ្វារភ្ជាប់តំបន់អាស៊ី និងអឺរ៉ុប ហើយប្រទេសអាល់បានី ជាតំបន់ឆ្លងកាត់ដ៏សំខាន់ក្នុងតំបន់បាល់កង់។
