មន្ទីរព័ត៌មានខេត្តព្រៃវែង បើកកិច្ចប្រជុំបូកសរុបលទ្ធផលការងារប្រចាំខែកុម្ភៈ និងលើកទិសដៅបន្ត
(ខេត្តព្រៃវែង)៖ នៅព្រឹកថ្ងៃទី២០ ខែកុម្ភៈ ឆ្នាំ២០២៦ មន្ទីរព័ត៌មានខេត្តព្រៃវែង បានរៀបចំកិច្ចប្រជុំបូកសរុបលទ្ធផលការងារប្រចាំខែកុម្ភៈ ដើម្បីពិនិត្យលើសមិទ្ធផលដែលសម្រេចបាន និងដាក់ចេញនូវទិសដៅការងារសម្រាប់ខែបន្ទាប់។ កិច្ចប្រជុំនេះបានប្រព្រឹត្តទៅក្រោមអធិបតីភាព លោក ញ៉ែម សៅគ្រី ប្រធានមន្ទីរព័ត៌មានខេត្តព្រៃវែង។
ក្នុងកិច្ចប្រជុំនេះដែរ ក៏មានការអញ្ជើញចូលរួមពីសំណាក់ លោកស្រីអនុប្រធានមន្ទីរ លោក-លោកស្រីប្រធាន អនុប្រធានការិយាល័យទាំង៥ ព្រមទាំងមន្ត្រីរាជការ និងមន្ត្រីកិច្ចសន្យាជាច្រើនរូបទៀត។
ជាកិច្ចចាប់ផ្តើម លោក-លោកស្រីប្រធានការិយាល័យទាំង៥ ចំណុះឱ្យមន្ទីរព័ត៌មានខេត្ត រួមមាន៖
១. ការិយាល័យរដ្ឋបាលបុគ្គលិក ផែនការ និងគណនេយ្យ
២. ការិយាល័យព័ត៌មាន និងសោតទស្សន៍
៣. ការិយាល័យវិទ្យុ
៤. ការិយាល័យទូរទស្សន៍
៥. ការិយាល័យទីភ្នាក់ងារសារព័ត៌មានកម្ពុជា (AKP)
បានឡើងធ្វើរបាយការណ៍សង្ខេប បង្ហាញពីលទ្ធផលការងារដែលបានអនុវត្តយ៉ាងសកម្មក្នុងខែកុម្ភៈ ក៏ដូចជាបញ្ហាប្រឈមមួយចំនួនដែលបានជួបប្រទះក្នុងពេលបំពេញភារកិច្ច។
មានប្រសាសន៍ក្នុងឱកាសនោះ លោក ញ៉ែម សៅគ្រី បានសម្តែងនូវការកោតសរសើរ និងវាយតម្លៃខ្ពស់ចំពោះកិច្ចខិតខំប្រឹងប្រែងរបស់ថ្នាក់ដឹកនាំការិយាល័យ និងមន្ត្រីទាំងអស់ ដែលបានសហការគ្នាសម្រេចបាននូវលទ្ធផលយ៉ាងល្អប្រសើរ។ ជាមួយគ្នានេះ លោកប្រធានមន្ទីរបានផ្តល់អនុសាសន៍ណែនាំសំខាន់ៗដល់មន្ត្រីទាំងអស់ដូចខាងក្រោម៖
ពង្រឹងកិច្ចសហការ បន្តសហការគ្នាឱ្យបានស្អិតរមួត ក្នុងការអនុវត្តតួនាទីភារកិច្ចតាមការិយាល័យនីមួយៗ ដើម្បីធានាឱ្យបាននូវប្រសិទ្ធភាពការងារកាន់តែខ្ពស់នៅខែបន្ទាប់។
ប្រយុទ្ធប្រឆាំងព័ត៌មានក្លែងក្លាយ ត្រូវបន្តខិតខំតាមដានព័ត៌មានក្លែងក្លាយ (Fake News) ដែលមានបំណងបំពុលសង្គម ដើម្បីធ្វើការបន្សាប និងបកស្រាយបំភ្លឺការពិតឱ្យបានទាន់ពេលវេលា ជូនដល់សាធារណជន។
កិច្ចប្រជុំបានបញ្ចប់ទៅក្នុងបរិយាកាសរីករាយ និងស្និទ្ធស្នាល ជាមួយនឹងការប្ដេជ្ញាចិត្តខ្ពស់ពីសំណាក់មន្ត្រីគ្រប់លំដាប់ថ្នាក់ ក្នុងការបម្រើសេវាព័ត៌មានជូនប្រជាពលរដ្ឋក្នុងខេត្តឱ្យកាន់តែប្រសើរឡើង៕
